28-29 май кунлари Ўзбекистон Республикаси Конституциявий суди ва Европада Хавфсизлик ва Ҳамкорлик Ташкилотининг Ўзбекистондаги лойиҳалари координатори билан ҳамкорликда “Конституциявий одил судловни таъминлаш. Конституциявий суд фаолиятининг долзарб масалалари ва устувор йўналишлари”  мавзуси доирасида ташкил этилган семинар-тренинг ўз ишини давом эттирди.  

Семинар-тренингда халқаро экспертлар томонидан Конституциявий  суднинг қонун чиқарувчи, ижро этувчи ва суд ҳокимияти ўртасидаги ўрни,  конституциявий назорат институтининг тарихий ва замонавий жиҳатлари, Конституциявий судлар фаолиятининг асослари, конституциявийликни назорат қилишнинг турли моделлари ва усуллари таҳлил қилинди. Конституциявий жараённинг тартиблари ва конституциявий одил судловни амалга оширишда суд аргументларининг хусусиятлари, Конституциявий суд ва суд-ҳуқуқ тизимининг турли бўғинлари ўртасидаги ўзаро ҳамкорлик масалалари, шунингдек, конституциявий норма талқинининг турли усуллари,  бунда суд қарорларини қабул қилишнинг прагматик, ахлоқий ва маданий жиҳатлари муҳокама қилинди.  

Шунингдек, тренингда Ўзбекистон Республикаси Конституциявий суди раисининг ўринбосари А.Ғафуров, судьялар Ж.Балкибаева ва К.Камиловлар томонидан конституциявий назорат принциплари, конституциявий судга мурожаат қилиш ва судда мурожаатларни кўриб чиқишнинг хусусиятлари ҳамда Конституциявий суд қарорларини ижро қилишга оид мавзуларда маърузалар қилинди. 

Семинар-тренингда иштирокчилар конституциявий шикоят институтини ривожлантиришда халқаро тажрибани ўрганиш, хорижий мамлакатлар конституциявий судларининг амалиётини ўрганиш юзасидан муҳокамалар бўлиб ўтди. Тренинг иштирокчилари турли конституциявийлик ҳолатларини таҳлил қилиш, Конституциявий суд қарорлари лойиҳаларини тайёрлаш каби мавзуларда гуруҳларга бўлинган ҳолда муҳокама қилдилар. 

2023 йил 30 апрелда қабул қилинган янгиланган Ўзбекистон Республикаси Конституцияси мамлакатимиз давлат органлари олдига фуқароларнинг конституциявий ҳуқуқлари ва давлат ҳокимияти тамойилларига риоя этилишини таъминлаш борасида янги вазифа ва талабларни қўяётгани алоҳида таъкидланди.   

Семинар-тренинг якунида барча иштирокчиларга Ўзбекистон Республикаси Конституциявий суди ва Европада Хавфсизлик ва Ҳамкорлик Ташкилотининг Ўзбекистондаги лойиҳалари координаторининг  сертификатлари топширилди.   

Ўзбекистон Республикаси

Конституциявий суди