Тошкент, 29 июль 2025 йил

   Олий Мажлис Қонунчилик палатасида “Кам таъминланган шахсларга давлат ҳисобидан юридик ёрдам кўрсатиш тизимини янада такомиллаштириш муносабати билан Ўзбекистон Республикасининг айрим қонун ҳужжатларига қўшимчалар киритиш тўғрисида”ги қонун лойиҳаси муҳокама қилинди.

   Мазкур қонун лойиҳаси Ўзбекистон Республикаси Конституциявий судининг қонунчилик ташаббуси ҳуқуқи асосида ишлаб чиқилган бўлиб, 2024 йилдаги ахборотида баён этилган таклиф ва тавсияларни амалга оширишга қаратилган. Лойиҳа фуқаролар, айниқса кам таъминланган шахслар томонидан Конституциявий судга мурожаат қилинганда, уларга давлат ҳисобидан малакали юридик ёрдам кўрсатиш ҳуқуқини ҳуқуқий жиҳатдан мустаҳкамлашни назарда тутади.

   Қонун лойиҳасининг қабул қилиниши фуқароларнинг Конституциявий суд орқали ҳуқуқ ва эркинликларини самарали ҳимоя қилишини таъминлашга, конституциявий одил судловга эришиш ҳуқуқининг амалий кафолатларини янада мустаҳкамлашга хизмат қилади. Шу орқали аҳолининг суд-ҳуқуқ тизимига бўлган ишончи янада ошиши кутилмоқда.

   Қонун лойиҳаси депутатлар томонидан биринчи ўқишда концептуал жиҳатдан маъқулланди.