eye
Россия Федерациясининг Инсон ҳуқуқлари бўйича вакили билан учрашув

     2025 йил 29 июль куни Ўзбекистон Республикаси Конституциявий суди раиси Мирзо-Улуғбек Абдусаломов Россия Федерациясидаги Инсон ҳуқуқлари бўйича вакил Татьяна Москалькова билан учрашди.

     Суҳбат чоғида инсон ҳуқуқ ва эркинликларини ҳимоя қилишнинг ҳуқуқий асосларини мустаҳкамлаш, қонун устуворлигини таъминлашда конституциявий назорат институтининг ўрни, шунингдек, икки мамлакат ўртасидаги ҳамкорликни янада ривожлантириш истиқболларига оид кенг кўламли масалалар муҳокама қилинди.

     Конституциявий одил судлов соҳасида давлатлараро ҳамкорликни кенгайтириш, шунингдек, ҳуқуқни қўллаш амалиётида тажриба алмашиш ва фуқаролик жамияти институтлари билан ўзаро ҳамкорликни ривожлантиришга алоҳида эътибор қаратилди.

       Ўзбекистон Республикаси Конституциявий суди раиси М.Абдусаломов мамлакатимизда Янги Ўзбекистон барпо этиш йўлида амалга оширилаётган демократик ислоҳотлар доирасида қонун устуворлиги асосларини мустаҳкамлаш, инсон ҳуқуқ ва эркинликларини таъминлаш, шунингдек, хорижий давлатларнинг тегишли институтлари билан халқаро ҳамкорликни йўлга қўйишга устувор аҳамият қаратилаётганини таъкидлади.

     Ҳамкорлик тўғрисидаги меморандум асосида Ўзбекистон Республикаси Конституциявий суди ва Россия Федерацияси Конституциявий суди ўртасида икки томонлама муносабатлар изчил ривожланиб бораётгани, қўшма тадбирлар ўтказилаётгани, ҳуқуқий ахборот ва тажриба алмашиш йўлга қўйилгани алоҳида қайд этилди.

   Россия Федерациясидаги Инсон ҳуқуқлари бўйича вакил Т.Москалькова Ўзбекистонда ҳуқуқни ҳимоя қилувчи институтларнинг изчил ривожланиб бораётганини юқори баҳолаб, инсон ҳуқуқлари бўйича миллий институтларни такомиллаштириш мақсадида ўзаро мулоқот ва тажриба алмашиш муҳимлигини таъкидлади.

     Учрашув якунида конструктив мулоқотни давом эттириш, ҳамкорликни мустаҳкамлаш ҳамда инсон ҳуқуқ ва эркинликларини таъминлаш, халқаро стандартларга мувофиқ ҳуқуқий институтларни ривожлантиришга қаратилган қўшма тадбирдларни амалга оширишдан манфаатдор эканлиги билдирилди.

Хатолик ҳақида маъмуриятга хабар бериш